穎廬 | Adada's Place

個人大咗，活到呢個年紀，開始面對失去，所以要學識放下執念。 追求本來係正面既，但過份執着，就變為無止境，形成負面思想。無咗既時候，要接受失去。失去咗既，可以放入回憶匣子，好好保存。 「是故空中無色，無受想行識。」《心經》 先覺知「無」，才能理解「空」。必須體認空無的自性，才能不貪求名利、不愛慕奢華、不戀棧權勢。 -  放下，不是放空！ Moving on to 2024，最希望能夠戒掉強迫症，保持豁達。一點點進步係需要既，但攰就要抖下，太高會缺氧。 Cheers, Ada

今次要介紹嘅呢一款係「逆齡面膜」， 同樣地佢都係日本無印限定，香港暫時未有得賣。 エイジングケア薬用リンクルケアクリームマスク Japan MUJI online shoIp JPY 1,990 佢個質地係厚cream形態，所以建議除非你真係皮膚好乾，或者冬天最凍嗰一兩日，否則其實係唔需要太厚咁樣敷嘅。 喺度提供一個最佳建議嘅使用方法：朝早一起身，唔需要洗面住，即刻就薄薄咁樣敷喺面額兩邊，額頭，鼻尖同埋下巴。然之後先至去刷牙。大概五分鐘到，用清水洗咗佢。然之後繼續你嘅日常早上嘅護膚程序同上妝。你會發覺呢五分鐘會令到你面部滑捋捋，上妝更加貼，冇咁容易浮粉。 另外一個用法就係當佢sleeping mask咁用。晚上做完所有護膚程序之後，薄薄咁樣喺額頭、兩邊面頰、同埋下巴 上一浸，薄薄地唔需要太厚，敷過夜。朝早用清水洗就ok喇！ Cheers, Ada

今次推介嘅呢款香港係冇得賣嘅。只可以喺日本無印買到。如果大家睇完有興趣嘅，可以嘗試搵代購喺日本無印online shop幫你訂。 呢支booster serum 好處就多喇，首先佢唔會太潤或者杰撻撻黐立立咁。但係好似處就勁喇：搽咗佢先至搽其他護膚品或者上妝都會更加吸收同埋貼妝。最有效嘅方法係，首先搽咗佢再用toner噴濕塊面，即時係會感到水潤！ JPY1990 (50ml):  muji Japan online shop 如果大家嫌麻煩唔想代購嘅，香港無印良品都有一支 booster essence lotion (200ml) ，效果相似不過就再稀啲水啲。可以試咗效果，先至再考慮會唔會代購日本嘅特別加強版。 Cheers, Ada

一件事嘅重要性，通常在於有冇人關注、重視。工作如是，生活也是。 有冇試過無心一句，之後，卻得到特別安排。事過境遷，景物依舊，人面全非，以為已被遺忘，卻發現依然被重視。見到嗰一下，心頭一暖。 對細節既重視，就係技術高低最直接的反映。最容易被漠視嘅往往即係呢啲睇嚟簡單、唔起眼嘅細節。將最容易嘅事情認真咁樣做好，就已經係不容易！ Cheers, Ada

每年聖誕前夕都會有啲感觸，應該咁講，10、11、12月就好似每個星期嘅weekend咁，係用嚟休息同埋檢討準備新開始。所以一到聖誕，就會感慨覺得，咁又過咗一年喇！ 整體嚟講，今年係辛苦嘅一年。無論事業同埋個人嚟講，都係充滿挑戰。所以嚟到呢個holiday season，都真係好想放個長假：清空一下、回顧一下、再籌備一下、準備下一年。 個人嚟講，今年嘅腳傷對於自己係件大事。學習放慢腳步，學習聆聽自己嘅身體，一切都要以身體健康為大前題。 工作方面，亦都順利得嚟有好多暗湧。萬事都要諗多步，未必事事都可以咁順心信心。但整體嚟講，都係有進步嘅，要畀個叻自己！ 自從再唔喺retail marketing裏面週旋，我都開始可以享受每個聖誕。今年Christmas希望可以同大家一齊歡度，放鬆心情，享受生活。 Cheers, Ada

有做gel甲嘅靚靚都知道，長期下來，指甲會變軟、變黄、離甲、甚至乎爛甲😣所以一路以嚟，除咗唔同嘅顏色gel甲之外，都尋覓緊一款好用嘅養甲精華。經過無數嘗試之後，終於畀我搵到！ 呢款樣甲精華，係好似透明指甲油咁嘅。資料顯示，建議做3個療程，每個療程3-4日。但係經過我測試，只要大概3日，1次嘅療程之下，指甲已經大有改善。 用法： 先卸下gel甲，修甲之後，塗上呢個精華一層，待5-10分鐘乾透。最少保持3日，最長1個星期，之後用洗甲水清除。1個療程已經見到指甲平滑堅硬返。如果未完全好返曬，可以重複呢個程序3-4次，靚靚指甲就會返晒嚟。 DAN DAN X GENTAL PINK 硬甲營養液套裝 - $198:  amor online shop  及門市有售 入手價唔貴，仲要有套裝價包埋洗甲水。快啲買定一樽喺屋企看門口吖！ Cheers, Ada

beaute de love 首次$298 whatsapp:62373239 角蛋白之前都介紹過，不過，過咗一段時間，價錢唔多唔少有上落，唔同嘅美容院服務質素亦有所不同。 今次推介呢間，同樣都係喺尖沙咀區，iSQUARE附近。 呢張圖係本人，亦都覺得今次效果唔錯，特別喺度介紹俾大家！ 注意：佢都幾旺場，想做嘅話，記住預早booking吖~ Cheers, Ada

多年嚟都特別注意保養眼肌，因為眼睛最容易暴露年齡秘密。咁多年嘅心得結論係：貴嘅眼部護膚品唔一定係最好。 今次推介呢款Eye Tight Laser Serum，中價位，適合作為眼部肌膚打底。 DR KENDRICK之前都介紹過，佢係open counter護膚品嘅一個驚喜。 呢一款serum滋潤功效不大，但係用咗兩個禮拜之後，會發現眼圈減淡咗同埋眼部肌膚緊緻咗，有去紋作用。所以建議用佢做打底之後要搽埋eye cream去做補濕，下次會再推介一set有效嘅日夜eye cream。 入手地點：各大有derma skincare open counter既萬寧 $428，仲可以儲yuu分 佢係透明gel 質地，用大概兩至四滴就可以夠兩隻眼周。一啲都唔笠，上下眼簾同埋魚尾紋位都可以搽。尤其是夜晚搽咗，第二朝瞓醒你會發現黑眼圈消失咗，好神奇！日頭搽完佢先上裝，你仲會發覺眼周肌膚細緻咗添！ 有興趣嘅即刻去萬寧入手，而家買Derma Skincare仲有$50 cash coupon可以即時減價。用完可以返嚟呢度留言，推介畀其他靚靚！ Cheers, Ada

一直以來都有一個哲學問題纏擾係腦裏面： 如果冇人類文明，冇任何文字電子嘅記載，咁千億萬年喺宇宙所發生嘅一切，仲算唔算發生過呢？可以話發生過嘅始終都係發生咗，但係如果冇記錄，咁又有冇意義呢？ 人嘅身體真係好奧妙，有些長者，經歷咗一生之後，老年嘅時候記憶力衰退，甚至患上腦退化症，忘記之前所發生嘅一切。但係我唔覺得咁樣係一種幸福，因為發生咗嘅所有嘢，佢身邊嘅人全部都記得。返而，感覺當事人自己潛意識在逃避。 有冇試過遇到一種情況，好想改變當時嘅狀態，所以不惜一切，精神傷害他人。過後，可能係刻意，可能係意識上既逃避，好快忘記咗件事。傷害人者如是，但被傷害者可能記一世。 人類既恩恩怨怨，就係咁樣生生世世，糾纏不清。所以我選擇相信因果循環。凡事總有原因，要發生既此終會發生，無謂執著，坦然接受。 Cheers, Ada

香港天氣潮濕，好多時就算夜晚冇飲好多水，第朝起身面部都會有水腫嘅情況。今次介紹呢款產品，就幫到你啦😀 Clarins - V Shaping Facial Lift: V Face Contouring Serum $1060 話曬佢都係Clarins嘅產品，入手價就唔會太平。但係每次只係用少少，所以都襟用嘅。 用嘅方法好簡單：如果朝頭早發現有水腫，洗完面爽膚水之後，搽薄薄一陣喺面。然之後跟住說明書入面嘅手法去按壓，大概1-2分鐘，立刻發現佢去水腫嘅能力極強。按壓完之後唔需要清洗，跟返正常護膚嘅程序就可以啦，個人覺得之後上護膚品比平常更吸收。 不過提一提，佢係去水腫並唔係瘦面㗎🤗 Cheers, Ada

重頭嚟過同再有一次機會係有唔同嘅。職場流流長，冇幾多次重頭嚟過，再有一次機會就更加絕無僅有，遇到就要好好珍惜！ 應該係咁理解嘅，重頭嚟過係由step 1再開始；而再有一次機會，可以話係由邊度跌倒，就邊度爬返起身。兩種情況都可以加快腳步，因為已經learn from mistakes；但係從頭嚟過之後，可能都會去返嗰個樽頸位卡住，而相對再有一次機會，會更加謹慎處理 ，中途再試，然後跨越之前，突飛猛進！ 而俾多次機會既當中，通常會關乎到一位伯樂，俗稱貴人。 而佢通常除咗個機會，仲會畀好多valuable advice，learning curve好steep，但會快速成長！ 貴人係唔會有label指明既，捉到鹿都要識脫角。我哋不防放開所有，用心感受，只要connect到一位，會發覺返工都可以好正能量！ Cheers, Ada

 一套關於take risk既真人真事。 由細到大，無論學校定係家教，都教我哋一切要有planning. 有風險即係唔穩陣，一定唔prefer.  對於呢個choice我係咁睇。風險越高，回報相對也更高。Well plan比較能確保平穩過渡，take risk可能最後一無所有，但亦可能係gold. 決定take唔take呢個risk在於有幾有信心係gold, 同埋咁唔咁心平淡渡過。 一街都係機會，問題係你有冇眼光，有冇堅持，有冇膽識？ 下定決心，下一個跑出嚟既，就係你！ Cheers, Ada

一個月內睇咗三套舞台劇，定必係復常之後第二件令我最開心嘅事。三套都笑中有淚，令人反思。 「愛我別走」相信係最接近我年齡層既一套，亦係最喜歡嘅一套。兩位神級演員，加上新場地，所以無論係同現場觀眾嘅互動，定係佈景嘅配合，都做到盡善盡美。個人最喜歡係細細粒過身嗰一幕，現場氣氛高漲，大家都好有共鳴。香港係我哋既地方，其實你真係捨得走咩？ 聚散匆匆莫牽掛  未記風波中英雄勇  就讓浮名輕拋劍外  千山我獨行不必相送 今日，看到一篇報道，入面有呢段： 「你是想人留下來（香港）？」記者問。 「這問題從來不在環境，而在心。全看你自不自在，安不安心。好比能在這裏安靜三小時，離開後，又回復固有狀態，又有何用？趟若尋到安心之道，是走是留，都沒問題。」 Credit yahoo!新聞：離散世代，一間村屋，一頓種植安寧的午餐  冼麗婷 2023年3月28日週二 上午11:20 「不散的筵席」講嘅係一個上一代嘅故事。地點係壽臣劇院，係相對舊嘅一個場地，加添咗懷舊嘅氣息。從父母口中聽過既一啲事蹟，都喺劇入面recall到。雖然未必能夠完全明白到上世紀嗰種人情味，但係從佢哋嗰個年代嘅終結，好似都望到我哋嘅現在、將來。諗起《金剛經》入面既一句 ：「過去心不可得，現在心不可得，未來心不可得。」其實，一切皆空。 「網上寂播」係相對比較有現代感嘅一套。 解說緊嘅係疫情期間我哋對於網絡世界及社交媒體嘅依賴，線上線下自己既角色混淆，寂寞擴張伸延。再加上近期既熱門話題：AI，更令我哋喺迷失與惶恐之中掙扎、反思。必要時更應switch off！ 三套舞台劇都令我有多少情緒。每日營營役役，有時都真係需要平衡一下。舞台劇既現場感一般都可以令我全程投入，暫時抽離一下。另一樣好喜歡嘅就係場刊既儀式感。係而家所有嘢都可以online access嘅時候，一本印出嚟嘅精美場刊，令我更加重視看舞台劇呢一個節目。 Cheers, Ada

細個小學讀書時，對與錯係好緊要嘅。考試嘅時候，對就得分、錯就扣分。自細已經教育我哋，凡事都有分對錯。 到咗中學，得知個過程原來都重要。即使答案係錯，中間嘅過程都可以得分。由嗰時開始，心中有個疑問：對與錯其實並非黑與白，係有灰色地帶既。縱使係咁，都依然覺得對錯係對立嘅。 出咗嚟社會，發現咗原來對可以變錯，錯亦可以便對，凡事冇絕對。呢個概念喺我心裏面糾纏咗好耐。當然，日子耐咗，菱角係會被磨蝕，但係並冇阻止我去figure out about this。 舉個例子：朱古力喺好耐以前係屬於一種宗教儀式中會使用既藥，並不是日常食用。後來，亦曾被當貨幣使用。但係到咗宜家，佢已經成為大衆可食用嘅糖果、甜點、飲品。 舉多個例子：以前男男或女女嘅關係，被人稱之為錯，不合常理。但到咗宜家，已經發展成為非常多樣化並廣泛接受。 我諗，就係呢個事情嘅對錯會因為時間而轉變既概念改變咗我嘅處事態度：有時真係唔需要太執著。同其他人會有分歧就係因為角度唔一樣，又或者對方既思想係建立於另一個時間點。並唔係要一定接纳其他人嘅諗法，只係可以嘗試吓去理解佢諗法嘅由來。基於佢嘅角度、時間點有分別，其實佢嘅諗法可以係好啱嘅。嘗試去認知，並且放下。其實，所有嘢都可以變得好簡單。 Cheers, Ada

放假前想講下工作。作一個回顧。 而家嘅工作係喺集團總部，主要處理各business unit (BU)既digital業務。平時周璇喺各大BU，細心聆聽同分析佢哋各方面嘅需求，繼而作出適當的安排。我哋條team10多人唔夠20人，其實係十個煲五個蓋，要面對各BU海量嘅要求，有時難免會處理得呢個，又少不免會分心，令到另外嗰個感覺被忽略。 某日，食飽晏，我哋兩條行立即開工。有個moment，同時間有三位同事access緊某個BU個deck，update緊份monthly review。另外有位同事，又正在同同一個BU嘅同事傾緊方案，一掛斷電話，又立即同另外一位同事討論處理方法。一有共識後，又立即電話回覆BU。計落，成條team有三分一同事，都處理緊同一個BU。 我哋嘅努力未必每一次都得到BU認同，但係嗰個moment，我覺得好proud of呢條team既毅力！ 休息係為行更遠既路。work smart, play harder. Counting down 4 days Cheers, Ada

三年冇去外地旅行，大家都話唔慣。其實，只係父母年代既事，當時網絡冇咁方便，放大假都只係留港消費；轉眼間，放假唔搭下飛機好似唔安樂。係上一代太節儉，定係我哋太幸福呢？ 今次外遊，唔想太用腦，所以都選擇咗返鄉下，非常適合旅客既國度。仲要係city，可以冇太多planning，瞓醒隨心去邊都可以。交通又放便，食嘢又一街都係，復甦返旅行，Tokyo實在是首選！ About last night 唔知係咪太耐冇出門緊張，定係純粹小學生去旅行興奮心態，尋晚竟然失眠。輾轉反側到兩點多，跟住都只係淺睡了數小時。 About today 難得嘅係，今朝醒來，一啲疲倦嘅感覺都冇。返工途中，聽著音樂，仲覺得有啲輕鬆。睇嚟，返鄉下，真係可以平衡生活心態。 Counting down 5 days Cheers, Ada

記得，當年，尚未有高清嘅年代，當時18、22，總覺得手機影出嚟嘅相片矇矇矓矓，睇唔清楚自己個靚樣(sor，呢部分有少少自戀)。 化妝嘅時候，畫眼線都小心翼翼，方死佢近睇自己嘅時候，會睇到嗰輕微既瑕疵。偏偏嗰時手機影出嚟嘅頭像相，就係睇唔清楚自己個樣！ 到咗今時今日，所有嘢都高清嘅時候，原來自己已經進入咗想睇嘢矇矇矓矓嘅年紀。蘋果肌跌咗少少，虎紋又深咗少少，雙下巴又 dum咗少少，jawline又模糊咗少少；做facial已經再唔係基本護理，hifu、冇針埋線、甚至乎thermage、ultherapy。做所有嘢都只係想抹走歲月痕跡，真係想唔認老都唔得。偏偏依家手機影出嚟嘅頭像相，就係睇得太清楚自己個樣！ 容貌係流動既，唔係static。就算今日20歲，擁有極漂亮俊俏既臉蛋，俾多20年、40年，終於都係會走樣；所以，從一開始就應該憑感覺。The right timing, in the mood, with the right person. 諗起呢首歌，原來都有7、8年歷史，但越聽越有味道…去歌喇！ 濛 - juno 詞 - wyman 暇疵不小必需靠近看還要看嗎 迷戀可將彼此那壞處全蓋過嗎 如果只想 減小障礙 眼鏡應該首先脫下了 才慢慢吻下 無暇除下每一滴暇疵嗎 既沒看出來 何必驚怕 眼前若變朦 便有好夢 平凡人亦可輕易被神化 如果看著我不妨濛一點 完全望表面或是未完善 容顏若 可隨年華磨損 你要那種溫暖 何曾由我用我的嘴臉 和眉目兌現 不妨濛一點 模糊地享受 現在在你旁邊 掌心的軟 靠幻想纏綿 不必看 我的臉 毛孔假使 清楚放大了 誰也怕怕 磨沙玻璃 將光折射了稜角會化 情願一起 散光遠視 見不得光的 乾脆別看 盲目地愛吧 無暇除下每一滴暇疵嗎 既沒看出來 何必驚怕 眼前若變朦 便有好夢 平凡人亦可輕易被神化 情願靠幻覺捏造幸福之戀 真的穿了再算 你共我眼裡仍可找到對方比較有趣那面 再踏前要是難避免 看見了牛頭馬面 如果看著我不妨濛一點 完全望表面或是未完善 容顏若 可隨年華磨損 你要那種溫暖 何曾由我用我的嘴臉 和眉目兌現 不妨濛一點 模糊地享受 現在在你旁邊 掌心的軟 靠幻想纏綿 不必看 我的臉 要是想纏綿 焦點要鬆一點 Cheers, Ada

對於面部護膚我係十分有要求嘅，因為自己細個嗰時暗瘡皮膚，冇$$去好好護理，所以大個咗，就鐵定要買啲適合自己皮膚嘅護膚 品，係老去之前好好保養！ 今次推介既係我係Mannings既開心大發現。價位唔算太低，但如果你皮膚乾，須要支滋潤得嚟唔笠嘅serum，呢支係的而且確非常啱用。 入手地點：各大有derma skincare open counter既Mannings $383，仲可以儲yuu分 DR KENDRICK係一個美國既醫美品牌，佢其他產品既門檻都算ok，之後我都有興趣試下佢支eye serum，到時再同大家分享。講返呢支Lipid Prescription Deep Moisturizer (30ml)先，佢嘅質地好似稀少少嘅B5咁，爽膚水後用大概5-6滴搽係面部。開頭你會覺得好似有少少笠，但其實一推開就好快吸收， 差唔多幾秒之間你就即時感受到面部皮膚柔軟咗，因為滋潤咗。搽完佢補番少少cream已經足夠，就算係冬天乾燥天氣都ok。同埋我發現用咗佢之後，日頭上妝都會貼服啲。 如果大家有其他好用護膚品，歡迎喺度開心share！ Cheers, Ada

以前，總覺得兩個人一齊，每天都可以係節日，無需要在特定日子慶祝。今年，好似真係心態唔同咗，諗法有多少改變。 以前，多的是時間，總覺得做任何事都仲有大把機會。加上自命瀟灑，以為平淡就好，不用那麼刻意。今年，好似突然重視儀式感，好想一切都安排妥當。 今年，發覺人生眨下眼已經行咗一大段。如果，將來諗返當日，我哋今天又有沒有好好製造回憶呢？當然，每天生活點滴都值得回顧，但當中有幾多係quality time而唔係柴米油鹽呢？ 今年，已踏入20+1周年，開始覺得永恆都短。既然，避免唔到每日重複刻板嘅生活同埋時日飛逝，何不係特別日子好好重視，為未來儲起今日。 A day less, is a day more! Cheers, Ada

經歷咗3晚：第一晚現場睇，完場即刻買第三場online，fufu既感染力係我意料之外；第二晚緊貼公海，一方面慶幸fufu能夠enjoy紅館個舞台，另一面後悔用咗個買飛quota幫朋友；第三晚，雖然不在現場，但online見到fufu好心痛， 籌備演唱會既壓力 加上 亡父既遺憾 ，當中既壓力對於出道短短兩年既年輕fufu實在沉重，終於可以放下心頭大石哭一場係感動既。 沉澱咗一日，加上演唱會後遺症，今日執筆，其實唔知由邊度寫起。有睇過我之前既post都知道我做賦二代既原因，無提及過既係我之前總有保留。外表咁cool，仲有點壞，究竟螢幕前嘅形象，到底有幾多分係真嘅呢？經過呢3晚，我改觀了。佢第一晚既緊張，知道自己做得唔好，到第二晚搵返感覺，從容面對，去到尾場最後放鬆曬，真情流露，呢一切都不虛假，完全誠實咁表露於大衆面前。 印象中，好似好耐都無一個咁真既artist。始終係公眾人物，維護形象好似係必要咁；太真實就無咗神秘感。但係呢個資訊既年代，與其由其他人發現，不如自己一早公開；與其編織形象，不如做回自己。follow fufu，除咗單純咁為咗support佢，依家多咗個使命：就係為樂壇好好保護一個清泉。時間同經驗可能會令fufu成長，但係希望佢呢份真會一直保留不變。 期待part II (尖叫🔥🔥)！ Cheers, Ada