穎廬 | Adada's Place

終於完成金繼一隻我打爛咗嘅杯。技術仲需要改善，效果並唔完美。不過，係呢個過程入面，我有所得着。 金繼係修復嘅藝術。首先，已經係從一個唔完美嘢開始，而實際上金繼有兩個主要目的：1）修補但唔隱藏佢破碎嘅過去，2）帶出修補後嘅另一面，希望會變成一件更美好嘅事情，從而接受。 喺維修過程中，每一步都好重要，每個細節都係關鍵。如果當中一個步驟做錯，就會影響到其他部分同整體效果。呢個正正係我哋現實生活中嘅反映：當有啲負面事情發生咗，我哋會嘗試改變、調整，將發生咗嘅傷害減到最低，呢個喺唔容易嘅。如果我哋想修復，就更加要加倍努力，而再加三倍努力，就可能更會有好嘅變化。如果將金繼套用係日常之中，佢更似係一個持續進行嘅過程，而唔係一個最終結果。 有冇可能，如果一開始就小心啲，唔好整爛佢，咁佢就永遠喺完美狀態，就唔需要修理？但老實講，我哋係咪可以一直維持喺一個完美嘅狀態？定係我哋其實係不停製造破壞？所以，金繼其實喺我哋日常生活嘅一部分。 喺我到而家為止嘅人生軌跡上，經歷過好多破碎。我以前總覺得呢啲係唔可以修復，我寧願將佢哋放埋一邊，然後忘記佢。鑽研金繼之後，我仍然睇唔到呢啲過去嘅未來，但我而家起碼可以為佢哋創造一個美好嘅結尾，然後 move on. 我暫時喺金繼入面得到嘅係：佢其實係我哋嘅生活方式。我哋破壞咗啲嘢，然後嘗試修復佢；唔係將佢變回原本嘅狀態，而係將佢轉化，更希望我哋最終可以將佢變成更好。接受不完美，其實喺我哋生活嘅一部分。 Cheers, Ada

唔知由幾時開始, 我嘅生日願望或者許願拜神都會希望開心快樂, 看似好簡單嘅一個願望, 但係對於我自己嚟講, 從來都唔容易. 小朋友嘅時候, 從來都唔懂得快樂, 以為係自己家庭內部嘅問題. 到咗青少年期間就開始喺外面搵快樂, 但係發覺都唔係咁容易. 直致成年之後, 先至知道原來係自己內在嘅問題. 今次去不丹旅行, 其中一個原因都係想知道何為一個開心嘅國家? 點解佢哋國民都好快樂? 好想知道. 好想理解之後, 就會有辦法令自己再開心啲. 成日都聽人講, 快樂好簡單, 今次嘅旅行, 令我見到嘅係, 快樂從來都唔簡單. 細個嘅時候係加法: 加多啲知識、加多啲金錢、加多啲人脈、加多啲經驗. 以為多啲就可以令自己叻啲, 生活豐富啲, 就會開心啲. 後來發覺, 太多其實係會飽㗎, 飽係會好辛苦, 有壓迫感, 快樂就會減少. 但係生活係現代, 亦都不能什麼都沒有, 不竟要維持基本嘅生活, 都唔係咁容易. 快樂既第一個元素: 要懂得選擇生活環境, 不需要求太高. 而不丹正正係無一切嘅現代化, 生活簡樸, 沒有太多誘惑嘅環境, 所以開心簡單嚟得容易. 金錢能夠帶嚟嘅一切都係身外物, 未必能夠令到心中富足. 試問心靈空虛, 又點會快樂呢? 而不丹人對佛教嘅虔誠, 正正令到佢哋從心而發嘅知足, 從而佢哋心中平和, 仲使生活唔富裕, 仍然能感覺快樂. 咁, 要活得開心快樂唔簡單既位喺邊呢? 就係當擁有過一切之後, 如果都可以放棄, 仍能知足嘅話, 就能享受到真正嘅快樂. 我唔敢講如果當不丹逐漸開放, 國民見識到呢個現代世界之後, 佢哋仲可唔可以back to basic? 定係佢哋根深蒂固嘅宗教信仰, 真係可以令佢哋看破一切, 還原基本步?  快樂嘅泉源係我今次旅程未能完全領唔到, 遺憾仲未搵到答案. Cheers, Ada

有時，我哋會覺得學到啲嘢，但係又唔係好肯定完全明白曬，直到後來 ， 隨著時間推進，望返轉頭，我哋先確定當中嘅意義。 以前，每當陷入困局時，我總會用「見到彩虹之前，必須學會接受風雨」這句話來安慰自己。後來，一位智者問我：「何不係落雨時搵個地方匿一陣呢？」今日，我終於真正領悟當中嘅深意。 當我哋陷入困局時，關鍵在於為什麼不設法避開一陣呢？雨過天晴之後，我哋依然可以發光發亮。困局往往伴隨著艱難嘅決定與棘手嘅後果；我哋不必吃盡苦頭才成長，應該可以用更高效嘅方法去處理。 所以，聰明地生活，好快就會見到雨過天晴嘅彩虹！ Cheers, Ada

想分享下我最近喺「金繼」得到嘅新體驗. 一切由我有兩件意外打爛咗嘅寶物開始 :  一隻陶瓷杯同一件瓷器擺設. 兩樣嘢對我嚟講都非常珍貴.好有紀念價值, 唔捨得揼, 結果就咁擺咗喺度好多年. 直到最近, 留意到「金繼」呢種藝術, 知道用呢種方法可以完美修復陶瓷. 呢個發現為我打開咗新嘅可能性俾呢兩件爛寶物; 加上自己玩ceramics多年, 破損或者有裂痕既作品真係家常便飯. 於是, 抱住嘗試嘅心態, 就報讀咗個金繼workshop. 嘩! 一上堂, 我即刻被嗰份接受殘缺, 順應自然既「侘寂（Wabi-Sabi）」美學吸引住! 就咁樣, 依家我就正式展開咗我嘅金繼旅程! Cheers, Ada

人生最奇妙嘅地方，係真正嘅巨變從來都唔會敲鑼打鼓。當你覺得日子平淡如水、好似無風無浪咁，其實時代嘅齒輪一早已經換咗波箱、轉埋波。 我哋成日問：面對未來，仲可以做啲咩？講真，與其喺度『等』運到、等機會去張羅你，不如將自己變成一個『容錯率極高、隨時可以進化』嘅系統。 所謂萬全嘅準備，從來都唔係叫你去神算未來，而係將而家呢段平靜嘅日子，當成你最好嘅『出 cheat（作弊）』時間——去學啲你睇唔明嘅新技術，去試啲隨時踩著舊石嘅副業，去一刀切清走身邊消耗緊你嘅圈子。 當變革嘅大浪真係成個拍埋嚟嗰陣，盲目喺度等嘅人只可以硬食被動迎戰；而嗰啲一早靜靜雞喺度進化嘅人，其實一早已經踩住浪尖，企咗喺風口位。 Cheers, Ada

"來好好給我活著就似最初" - 黃偉文 坐喺候機室嘅呢個moment, 終於可以靜靜地咁樣為呢個旅程寫一個序曲. 每一次旅行都可以將自己既身心reset: 日復如是嘅生活習慣、根深蒂固嘅睇法想法、人生計劃、價值觀、眼界、同埋煩瑣執着都通通重整. 冇人知道聽日會發生咩事, 可以做嘅就係呢一刻做應該做嘅事 - 活在當下, 享受生活.  計劃趕不上變化, 有時係要俾時間慢慢流過, 事情先會慢慢浮面. 感覺亦都會慢慢沉澱.喺過程之中, 毋須焦慮地overthink and overreact. 淡定靜觀其變, 其實就係最舒服嘅一個處理. 九州, here I come! Cheers, Ada

如果, 信有有個天睇住, 如果信因果, 所有發生嘅嘢都有佢嘅原因...今日唔想講經, 淨係想分享, 今年開咗個靚頭, 萬般滋味在心頭. 好既原因係每日都過得超乎想像既開心、有信心及安心. 希望呢種順暢會繼續延續落去. 珍惜每一天. Cheer, Ada

「生命的意義，在於賦予生命意義」 - 維克多·法蘭克 無論係個人層面, 定係同朋友傾計, 一路都有探討呢個話題, 就係究竟生命有咩意義. 老生常談嘅係, 所有生存時候努力爭取嘅物質, 明利, 權勢, 甚至人脈, 友誼通通都帶唔走. 我哋嚟嘅時候係豁然一身, 走嘅時候都係. 本來無一物. 反而令我哋應該珍惜嘅係, 喺呢個爭取過程嘅經歷, 所有既學習, 修行, 因果都會繼續影響住我哋生生世世. 低谷令到我哋更加珍惜高峰. 遇見令到我哋惜緣. 失去令到我哋明白擁有. 能夠睇到呢篇講經, 係我同你之間嘅緣份. 慶幸沿途有你哋, 令到我呢生不至於太無聊. ____________________________________ "The meaning of life is to give life meaning." Viktor Frankl Cheers, Ada