穎廬 | Adada's Place

想分享下我最近喺「金繼」得到嘅新體驗. 一切由我有兩件意外打爛咗嘅寶物開始 :  一隻陶瓷杯同一件瓷器擺設. 兩樣嘢對我嚟講都非常珍貴.好有紀念價值, 唔捨得揼, 結果就咁擺咗喺度好多年. 直到最近, 留意到「金繼」呢種藝術, 知道用呢種方法可以完美修復陶瓷. 呢個發現為我打開咗新嘅可能性俾呢兩件爛寶物; 加上自己玩ceramics多年, 破損或者有裂痕既作品真係家常便飯. 於是, 抱住嘗試嘅心態, 就報讀咗個金繼workshop. 嘩! 一上堂, 我即刻被嗰份接受殘缺, 順應自然既「侘寂（Wabi-Sabi）」美學吸引住! 就咁樣, 依家我就正式展開咗我嘅金繼旅程! Cheers, Ada

人生最奇妙嘅地方，係真正嘅巨變從來都唔會敲鑼打鼓。當你覺得日子平淡如水、好似無風無浪咁，其實時代嘅齒輪一早已經換咗波箱、轉埋波。 我哋成日問：面對未來，仲可以做啲咩？講真，與其喺度『等』運到、等機會去張羅你，不如將自己變成一個『容錯率極高、隨時可以進化』嘅系統。 所謂萬全嘅準備，從來都唔係叫你去神算未來，而係將而家呢段平靜嘅日子，當成你最好嘅『出 cheat（作弊）』時間——去學啲你睇唔明嘅新技術，去試啲隨時踩著舊石嘅副業，去一刀切清走身邊消耗緊你嘅圈子。 當變革嘅大浪真係成個拍埋嚟嗰陣，盲目喺度等嘅人只可以硬食被動迎戰；而嗰啲一早靜靜雞喺度進化嘅人，其實一早已經踩住浪尖，企咗喺風口位。 Cheers, Ada

"來好好給我活著就似最初" - 黃偉文 坐喺候機室嘅呢個moment, 終於可以靜靜地咁樣為呢個旅程寫一個序曲. 每一次旅行都可以將自己既身心reset: 日復如是嘅生活習慣、根深蒂固嘅睇法想法、人生計劃、價值觀、眼界、同埋煩瑣執着都通通重整. 冇人知道聽日會發生咩事, 可以做嘅就係呢一刻做應該做嘅事 - 活在當下, 享受生活.  計劃趕不上變化, 有時係要俾時間慢慢流過, 事情先會慢慢浮面. 感覺亦都會慢慢沉澱.喺過程之中, 毋須焦慮地overthink and overreact. 淡定靜觀其變, 其實就係最舒服嘅一個處理. 九州, here I come! Cheers, Ada

如果, 信有有個天睇住, 如果信因果, 所有發生嘅嘢都有佢嘅原因...今日唔想講經, 淨係想分享, 今年開咗個靚頭, 萬般滋味在心頭. 好既原因係每日都過得超乎想像既開心、有信心及安心. 希望呢種順暢會繼續延續落去. 珍惜每一天. Cheer, Ada

「生命的意義，在於賦予生命意義」 - 維克多·法蘭克 無論係個人層面, 定係同朋友傾計, 一路都有探討呢個話題, 就係究竟生命有咩意義. 老生常談嘅係, 所有生存時候努力爭取嘅物質, 明利, 權勢, 甚至人脈, 友誼通通都帶唔走. 我哋嚟嘅時候係豁然一身, 走嘅時候都係. 本來無一物. 反而令我哋應該珍惜嘅係, 喺呢個爭取過程嘅經歷, 所有既學習, 修行, 因果都會繼續影響住我哋生生世世. 低谷令到我哋更加珍惜高峰. 遇見令到我哋惜緣. 失去令到我哋明白擁有. 能夠睇到呢篇講經, 係我同你之間嘅緣份. 慶幸沿途有你哋, 令到我呢生不至於太無聊. ____________________________________ "The meaning of life is to give life meaning." Viktor Frankl Cheers, Ada

2005令我經歷好多呢啲老土嘢就唔講啦. 不如講下我實際上做咗啲乜. 工作上, 兩次轉role. 喺職場上打滾咗咁多年, 呢個經歷只可以話係艱辛, 談不上成長, 但係能令到我關係斷捨離, 都係一件好事. 法國, 巴黎一路都係我嘅dream trip, 今年終於達成咗喇. 法國真係一個好夢幻嘅地方, 身處其中, 好似完全抽離咗咁, 去咗另一個世界.  今年跑步加操, 有大半年時間一個星期跑三晚. 對於我嚟講真係一個大躍進, 所以去到年尾, 就要抖一抖啦. 臨近年尾, 好想搵啲嘢學下. 於是我就開始pick up一個新嘅語言. 放低咗學習嘅技巧咁多年, 原來都冇生疏到, so far so good! 好似渾渾噩噩就過咗一年. 2026會唔會更加努力? 我唔敢講. 只係覺得人大咗, 每一日都好似賺返嚟咁, 珍惜當下! photo credit: the Internet Cheers, Ada

今日想講嘅話題係長大, 一切嚟得好自然. 個impact係, 原來成長係代表著事情要自己去面對. 但係當ready嘅時候, 呢樣嘢又唔係咁匪夷所思嘅. 費解嘅係, 喺學校咁多年, 學習點樣群體生活, 但原來最終要學識嘅係獨立. 成長嘅路上有啲孤單, 依然勇敢面對, 畢竟要忠於自己, 面對自己!  __________________ 詞：莫可欣/郭可盈  曲：C.Y Kong 唱：去歌>> 王菲   想到昨日 我尚幼小 望向風裏 愛天真淺笑 天空永恆幻變 多麼奧妙 我卻幼稚管不了 青匆歲月 靜靜遠飄 路上奔波 再也不懂淺笑 彷佛汽球在風飄 怎意料 慨嘆這是否需要 你説這叫長大 我説多麼的費解 我愛看這世上有多大 可惜世界 轉變太快 當我厭倦 再沒法走 默默哭叫 我要當天所有 感觸世情幻變猜想以後 不改只有 遠遠的星宿 每次失意躲避 我説多麼可悲 我愛昨天那自我天地 多麼粗糙 卻也多優美 __________________ Cheers, Ada

一眨眼就一年, 又到咗十二月. 今年在我自己嚟講過得不容易, 當中有得既, 亦可以話得多於失, 而失既都只係清空垃圾. 依家啲人成日話要躺平, 屬於一種自我放棄既狀態. 但我比較喜歡放下, 係一個處於我仍然運作, 但係唔會強求嘅狀態. 不過, 近日發現躺平亦會有意外收獲. 原來當我俾咁既反應, 隊友反而會take action行動, 有點以其人之道還治其人之身而有所得著. 說穿了就係以退為進. 只係, 我冇進嘅目的, 我真心想試試躺平既感覺. 亦即是係當大家話要躺平時, 其實係想等其他人去執屎, 咁已經否定咗原本躺平既真正意思. Photo credit: the Internet 近日, 香港所有嘢都低調. 大家都帶住傷痛嘅心情. 今年嘅聖誕新年, 會係大家反思從新開始嘅一個過渡時期. 我呢個時候講躺平, 好似好不負責. 但係, 其實係有需要放鬆繃緊心情, 暫時舒緩一下, 因為仲有漫漫長路要走. 工作係咁, 無常係咁, 人生都係咁, 要令自己內心足夠強大, 先至可以面對一切. 我相信上天冥冥中總有安排, 如果呢一刻諗唔通, 不妨暫時放低, 畀時間慢慢流, 畀事情漸漸發酵, 一切總有解決方法. moment of silence, Ada

潛意識係一樣神奇嘅東西, 從來冇懷疑過佢, 只不過未真正發生過要面對佢帶嚟嘅威力, 直至今日. 一件往事, 係有傷害既, 只不過冇估計到影響係咁深遠. 當我見到個女仔, 捧住一個蛋糕盒, 入面應該係一個生日蛋糕嘅時候, 嗰一剎那, 呢段往事就好似電影咁樣放返出. 生日蛋糕年年都食, 收過不少, 亦送出不少, 但呢件事, 一直都冇再走出嚟. 佢由subconscious變成conscious, 其實係咪有啲咩要我正視呢？直覺話俾我知同我今日處理咗一件工作既事情有關; 與其啞忍, 不如面對. 係不公平, 係欺凌, 係不信任, 係自私, 係創傷. 當年做嘅事無後悔, 就好似今日要面對嘅, 亦都辦得到. 又一成就解鎖✌️ Cheers, Ada

Photo credit: the Internet ‘’你無法控制生活中發生的事, 但你可以控制自己對這些事情的反應." - 布魯克斯 呢句說話, 講就易, 實行需要練習, 要有道行. 最近睇咗苗醫生本新書, 內容記錄咗佢行醫三十多年既案例. 有詳細描述如何醫治, 處理及往後生活. 其中關於DID (Dissociative Identity Disorder 解離性身份障礙)令我有啲啟發. 解離人分裂出嚟既人格其實係當事人遇到極大創傷性事情時, 身體令到本體能夠繼續面對實況而本能地產生出來, 呢啲人格能夠令到本體係唔同情况時足以面對而不之於崩潰. 認知係精神健康既第一步. 當解離人知道有咁既情况後, 要面對既係如何整合, 並唔係殲滅. 裂縫不會消失, 而係要學會喺唔完美中生活. 於是, 就要學懂改變想法, 令自己好過點. 看似好難, 但係其實中國人文化哲學中, 一早已經有呢個概念: 塞翁失馬, 焉知非福. 呢個情景已經清楚說明, 每件事都有兩面. 當然, 實際操作時並唔容易. 但係正因為已發生既係不能刪改, 要令自已遊刃有餘咁生存下去, 就要改變觀點. 只剩下半杯水同仲有半杯水, 兩個睇法都無錯, 在於哪一個說法會令自己活得自在.  DID係極端情況會出現既自我保護機制. 當然, 日常我哋都應該好好運用不同角度去睇發生既事情, 做好情緒管理, 無需要每事都逼得太緊. 生活既節奏, 本來就應該由自己操控, 活得悠然自得. Cheers, Ada

photo credit: the Internet 人生擁有很多, 需要爭取好多, 錢、權、地位、物質、社交圈、理想、健康、家庭, 等等. 一杯水, 何只是滿, 簡直是瀉. 箇中學懂嘅技巧就係, 每個人隻碗雖然容量不一, 但係都係有限, 與其等佢滿瀉, 會唔會選擇自行拎走某啲多餘嘢呢？ 呢度有兩個大智慧：第一就係要令到自己可以主動接受新挑戰, 就要放棄冇用既嘢. 第二就係學懂自主地騰出空間, 令到自己有容量有機會接受新事物. 對於啲乜嘢可以出現係我既軌跡, 我認, 我係呢方面係有強迫症. 垃圾, 係應該放去垃圾筒, 我生命裏只值得擁有最premium既. 減法每日都係我哋身邊運算, 斷捨離係我哋嘅大原則, 要懂得適時捨得放手. 留白, 係一種藝術. Cheers, Ada

好耐都冇試過咁早醒咗, 尤其是係一個星期六. 今個星期的而且確係過山車, 好多事情發生咗. 嚟得突然, 我都只係啱啱接受咗. 與其話我已經準備好, 其實正確啲嚟講, 前面條路唔係容易行, 不過係一條好路. 挑戰嘅可能唔係我嘅最強項, 但係正正咁樣就可以令到我再次成長. 一切準備就緒, 請接招🫡 多謝沿路一直默默撐我嘅, 嚟緊, 繼續, 多多指教！ Photo credit: the Internet Cheers, Ada

Photo credit: the Internet 經過暴風式連環旅行之後, 穩定返返工一個多星期. 今日如常忙碌地處理工作嘅時候, 忽發奇想, 有一個諗法. 我自己喺腦海裏面都組織咗一陣子先至能夠搞清楚究竟我諗嘅係乜嘢, 等我試下同大家分享. 工作環境上, 係處於比較大嘅機構, 當中嘅人物關係係複雜既. 所以每日、每一步、會講既每一句說話、會send出既email, 其實都要好小心. 我稱之為步步為營. 情緒上, 有一個新發現. 每次當有負面情緒或者急躁想發脾氣嘅時候, 只要自己冷靜落嚟, 停一停, 揾方法解決, 諗通咗, 其實係可以避免壞情緒入侵嘅. 咁呢兩樣嘢其實點樣串連起嚟呢？  壞情緒出現嘅時候, 唔肯停落嚟諗清楚, 通常都係身邊有其他人可依賴. 當係工作環境時, 要自己面對, 自不然就會冷靜落嚟. 所以, 如果自己personal嘅事情都可以做到冷靜落嚟呢一部分, 其實, 好多問題就可以避免. 呢個係正面嘅諗法. 每日工作起碼八小時, 差唔多有大半嘅時間都要步步為營, 其實呢啲係無形壓力. 所以我又會咁諗, 如果身邊有個人, 有時可以俾自己發下小脾氣, 都係一種幸福. Cheers, Ada

"水至清則無魚，人至察則無徒。冕而前旒，所以蔽明；黈纊充耳，所以塞聰。" ～西漢‧東方朔〈答客難〉 呢個說法聽很多, 今天才弄清楚解說. 應該咁講, 早多幾年前, 就算看到說明, 都未有道行領悟. 今天, 真的明白了. 現今科技, 就算機器都會故障, 試問又怎可能要求人就十全十美呢？ 以前會質疑, 水唔清, 又點樣睇清楚啲魚. 依家終於明白, 水太清就無養份, 魚都生存不了. 其實, 當位於高處, 真的無需要每事都問、每事都知, 所以, 總覺得"水清則無魚"都要配合位置. 而對於我呢啲揼石仔既, 都係清清楚楚, 以示清白好啲. Cheers, Ada

關於生死, 大家呢排可能諗多咗, 諗深咗。套電影係好睇嘅, 但並冇改變到我一向對生死嘅睇法, 我係咁諗嘅： 死呢個話題係我哋呢一代已經再冇咁忌諱, 反而覺得瑞士好偉大。死並唔可怕, 甚至乎係瀟灑, 隻身上路, 乜嘢都唔帶走。反而, 生存落嚟嘅, 就有包袱, 要歷練。生前可以作出好多planning去安排身後事, 但係要面對既, 此终係存活嘅生人。其實, 活生生既人, 先至要繼續往後地獄般既日子。我認, 活到呢個年紀, 都未能夠看破生死。兩隻小可愛離世嘅情景歷歷在目, 到而家都未能夠接受另一隻, 就係好驚要再面對一次。 選擇咗組織二人家庭, 面對生死就係50/50。 要餘生面對一縷青煙咁無窮無盡去思念, 我諗我頂唔順。但係反之要對方去面對呢個情景, 我亦唔忍心。雖然套戲叫大家要珍惜過程, 但係到要面對既時候, 係咪又可以咁豁達呢？ 電影海報展內, 我最喜歡以下呢一幅, 佢唔係最耀眼, 淡淡然, 隱隱作痛。 Credit: instagram.com/terencechoiyt Not_Cheers, Ada

每日lunch hour係忙碌工作嘅舒緩點。話題日日唔同，今日就講到點樣揀另一半。 細個嘅時候總係有好多幻想，希望佢高大威猛英俊靚仔，人品好，最好仲有一定既經濟能力。跌跌碰碰之後發覺，並唔係世事唔完美，只係緣份實在太奇妙。 眼緣 ：如果你信嘅，就已經跌入上天畀你嘅安排。未曾深入認識一個人，單憑長相已經有好感，其實同撞邪一樣。 性格好夾 ：如果仲要有咁嘅感覺，其實結婚機會率已經係60%。佢I你E，都可以好夾。佢E你E， 又可能唔夾。其實唔係兩塊 puzzle，係兩嚿海綿，夾唔夾，睇你點拿捏。真正既挑戰係甜蜜過後，如何接納互相既缺點。變數實在太多，當下最睇唔過眼既，假以時日，又有可能成為優點。 Timing & Time ：堅持揾一個付合條件既同時，都要睇吓個天按排咗啲咩人入你生命。 錯嘅人，都可以係啱嘅時候有chemistry，但時間會係最好既磨練。其實，冥冥中，早有安排。 緣分到，自然會遇到。 計劃趕不上變化。 有種轉變，叫甘心情願。 Cheers, Ada

好多時, 當面前有好多要事情要處理嘅時候, 未必會即時發現佢嘅impact. 事過境遷回顧返, 就會發現原來自己已經成長咗. 年紀越嚟越大嘅時候(即係老咗), 會發覺時間過得特別快. 當有時間停落嚟, 站穩陣腳嘅時候, 已經發覺原來自己改變咗. 過往一直努力追求嘅東西, 而家可能變得不重要. 但又發覺而家嘅status都唔錯, 其實兩樣嘢係冇衝突嘅. 如果當初強行將追求嘅嘢實現咗, 到最後都係發覺唔重要, 咁其實, 原來行慢一啲都可以. 大概, 呢個就係慢活嘅優點. Cheers, Ada

每個人對自己生活嘅每一個細節都總有要求，冇話高定低，但都各有所需。曾經認為，呢樣係必然， 近排發現原來都唔一定，或者公平啲咁講，就係因為有高低之分，所以就有expectation嘅差距。 舉個例子，A認為9分先滿足，而B達到5分已經好滿意喇。當現況係5分嘅時候，B已經停止再向前行，而A仲喺度跑緊 ，滿以為B沒有要求，其實只係B已覺達標。 只於點樣拉近呢個距離就係art。除咗雙方都要互相遷就，更要有一個穩陣嘅基礎。5分嘅要求，冇可能立即變9分，同樣地，9分嘅要求都唔會即刻降低至5分。點樣喺5分至9分之間拿捏一個中間點，就係藝術。而點樣妥協係中間點，就係遷就。 話須如此，但係一開始作出選擇嘅時候，就唔好揀一個距離太遠嘅。需要物質嘅，就揀有經濟能力嘅；需要時間嘅，就揀一個工作唔會太忙嘅；需要浪漫嘅，就唔好揀一個理科嘅。始終，要求作出改變，多少都係向難度挑戰。 Cheers, Ada

有啲說話成日會聽到，例如： 當個天閂咗隻窗，總會開返隻門畀你嘅！ The end is also a beginning. 喺唔同嘅情況之下，我哋可能都多多少少感受過。局外人，唔會完全明白箇中感受，而當局者可能迷，但係其實係好清楚知道自己要啲咩嘅。 過咗去嘅係要好好珍惜，其實係永遠都會喺我哋嘅心裹記憶裏。而當現實反映改變咗實况嘅時候，我哋都應該隨住佢而變。呢個亦都係改變唔到嘅事實，我哋只可以接受，and then move on. Cheers Ada

今日天氣有啲悶熱。想落雨又落唔出， 醞釀咗一點情緒。 呢排都幾忙，唔係好多時間可以me time，静静咁樣諗下嘢。今日静落嚟嘅時候，呢首歌一路喺我腦裏面盤旋，揮之不去。 去歌： 赤裸的秘密 - 劇場版 就像是一艘飛向星的客機 心彷彿早已離地 身邊的一切游離 不夠膽望向你 為怕你知道此刻的心理 還是推開你 去呼吸空氣 盡力地說一些笑話做逃避 偏不知怎麼說起 方可找得到自己 為何能遇上你 能驟眼己感到沒半點距離 純屬緣份 還是如以往我再自欺 偷偷感激你 能讓我再試這滋味 無奈我卻怕愛比刀鋒更利 更癡戀也是要捨棄 只好感激你 明日我要與你分飛千里 留下我愛你這赤裸的秘密 也只好偶然再想起 每一個人都總有啲係心底嘅秘密，小朋友有，大個咗，年紀越大，就越更加多，並唔係咁容易可以同人分享。 呢啲秘密擺喺心裏面無傷大雅，因為講咗出嚟，可能會令人好驚訝。但總有啲時候，好想搵個樹窿或者向馬桶講曬出嚟，然後又可以繼續每日嘅規律。秘密始終係擺喺心裏面安全，顧存大局，減少傷害。Silence is Gold. Cheers, Ada