穎廬 | Adada's Place

天氣轉冷變得乾燥，係時候推介冬季護膚品。我自己皮膚有少少敏感，用咗呢支serum後，明顯無咗泛紅。佢有淡淡既玫瑰花香，非常清新！ Rose with Bakuchiol Facial Serum 30 ml - $147 呢支serum質地比較清爽，唔會得個立字，但又足夠補濕。一般我會係toner之後用佢，5滴輕拍上面，之後再搽cream。入手價唔貴，試過你會返唔到轉頭。成份可去以上網址查詢及選購。宜家仲有Christmas promotion，一於買支俾自己做聖誕禮物，好好愛惜自己皮膚。 Cheers, Ada

無可否認，social media係我哋生活既一部份。亦因為咁，我哋要好好選擇乜嘢人、乜嘢post會feed係自己既視線範圍。以下係我總括咗一啲要停賽30日既人和事，再冇改善就要永久block，實行嚟個social media斷捨離： 🙅🏻有一批移民咗既人，好似仲抱住個心依然係香港咁，經常係度強調自己既政治立場，確實係煩！ 🙅🏻有個別窮得只有物質既人，當咗呢度係佢啲朋友whatsapp group咁，keep住炫耀物質晒命，令人反感！ 🙅🏻有一類人當咗呢度係佢個scheduler咁，每日update自己幾時做咗啲乜，見咗咩人，圖文並茂，極為攪笑！ 🙅🏻傳銷界保險界既，請勿濫用social media，以免弄巧反拙！ 🙅🏻亦有負能量爆燈既人，充分運用呢度去放負文，什麼工作上既不滿、同男朋友鬧交、對社會既控訴等，要遠離！ 🙅🏻被偷聽後或retargeting既贊助同埋為你推薦既廣告，討厭之最！ 🙅🏻有一啲人生活得並唔開心但揾唔到出路，於是不停係度強調自己如何成功、快樂，極度渴望得到認同，加以肯定。對此toxic行為敬而遠之！ 🙅🏻關於疫情、動態清零等既post，今時今日實在唔想再見到！ 🙅🏻嗰啲標題跨到大一大，引人入去睇，但內容其實冇料到既post！ 自己social media自己manage，要確保每次睇都身心愉快😀 Cheers, Ada

一路都好想寫關於追星，但未諗到從咩出發點寫。尋晚，好投入咁去做咗一件事，啟發到靈感。 對於我嚟講，上一期追星已經係中學遠古。出嚟做嘢後總有百樣嘢忙，自己既空閒時間極少。近期開始平穩落嚟，有時間聽吓歌，四圍八卦吓。轉列點係一次係IG聽到古sir同fufu首〈 自我按慰 〉，特別鍾意佢用咗〈 記憶棉 〉音樂intro，個人認為，fufu唱得比原唱更有感情。 就係咁，我就開始搜尋返佢所有既資料、報導、演出及同fans既互動既IG。佢最令我著迷既係佢一啲偶包都冇，完全展現佢最真既一面。呢一點好珍貴，係宜家資訊發達既年代，如果仲要刻意形做一個偶像既形象就會好假，亦唔需要，做自己就可以了。仲有就係佢勇於接受批評，正面面對自己既缺點，好叻叻！另一個感動位就係佢對爸爸既感情，相信佢爸爸係遠方都感受到。 接下來我就決定咗加入MCFC做賦二代，每日放工車轆TG/IG，期待佢上水互動。當一知道佢會開solo concert我就作出一切準備，為求一票。特別感謝今次FC既按排，令賦二代唔一定要等公售或黄牛。係準備考試呢個過程，亦令我更加認識fufu，要有收穫，就要付出。最難得係成功感染埋我家主人，fufu力量不容忽視！ 一把年紀再追星，感受同細個時唔一樣。除咗靚仔同好唱得，亦更懂得去欣賞佢本尊為人。有時生活得悶或枯燥時，重溫返佢啲voice messages或IG Story，即刻精神哂😍  歡迎大家留言分享成魔之路！ Cheers, Ada

想講關於時間。每人每日都有24小時，無論戴既係Apple Watch定係Casio都唔會多咗時間。之於如何善用，就各有不同。而有一樣可以肯定既就係，錶無論幾貴，都買唔到值得回憶既時光、自由自在無拘無束既心情。所以，與其追求，不如珍惜現在所擁有！ 去歌： 陀飛輪 曾付出 幾多心跳 來換取 一堆堆的發票 人值得 命中減少幾秒 多買一隻錶 秒速捉得緊了 而皮膚竟偷偷鬆了 為何用到盡了 至知那樣緊要 勞力是無止境 活著多好 不需要靠物證 也不以高薪高職高級品搏尊敬 就算搏到 伯爵那地位和蕭邦的雋永 賣了任性 日拼夜拼 忘掉了為甚麼高興 Cheers, Ada

時間係唔呃人既，我有既時間同你一樣，而且從來都冇停止流逝。 眨下眼，又大一年了。 年輕既時候總係唔懂得珍惜時間，為咗好多追求而去拼搏。Time係用咗，但並唔算係quality。不眠不休咁去工作爭取名利，然後又要蒲天光去減壓，甚至病倒了要停下來。行到呢個年頭，先至明白咁樣係虛耗緊人生。時間係應該可以用得更好嘅！ 其實，可以靜靜咁樣喺屋企梳化碌下電話，嘆下零食，瞓個晏覺，都係一種享受。咁辛苦做樓奴，其實，又有冇真係真正享受下喺屋企嘅me time呢？ 咁辛苦去追求權力金錢，其實，又有冇好好停落嚟享受下呢？ 今年開始，要學懂生活。 Cheers, Ada

勉強再試試站立 自願地展開學習 盡快適應著 殘忍的低氣壓 似欠缺勇氣 不敢失去你 亦欠骨氣讓 身心也逃離 從頭再呼吸 沉沉那死氣 滲滿氧化浪漫 沉迷在這耐人尋味 〈 呼吸有害 〉 有冇試過遇到一個人，佢既存在就好似空氣咁，那麼理所當然，平常到察覺唔到，直到失去咗。突然，所有嘢都唔對路。窒息嘅感覺令到生存都彷彿不可能。四處碰到既人都好似係佢，行近啲又好似唔係。其實，要揾返呢個氧氣樽並唔難，就只差一線。 就只係一步之差，就可以了。 Cheers, Ada

上星期尾睇咗呢套戲，沉澱咗一個星期，今日先至落筆。 首先， 姜🍑 － 係靚仔嘅！就算當呢套係青春偶像戲，都值得買飛睇嘅。入戲院之前，我刻意冇睇劇透，所以都好好奇，究竟阿媽有咗邊個第二個呢？ 美鳳當年為咗相夫教子而放棄造星作為套戲既開場白的而且確有啲老土，不過，又真係上一代常會發生既選擇。到阿Jer飾演既子軒妒忌阿媽捧紅姜🍑飾演既嘅新星方晴時，我就真係覺得編劇有點保守，太低估依家年輕人面對問題既能力。對比起時下年輕人所面既性別認同、民族主義以及前途、生活等，子軒面對父母離異所表現既似乎太留於表面。幸好，美鳳呢個角色演活咗上一代所面對既掙扎。成套戲嘅靈魂人物係媽媽呢個角色，毛舜筠既演技帶動住成套戲既情緒。 方晴呢個角色直頭係為姜🍑度身訂做，安排咗大量姜🍑個人表演既情節，亦有佢自身既影子，令姜🍬們有多個尖叫既位置！其中最觸動既就係佢重唱陳奕迅既〈今天只做一件事〉，聲線青澀中帶點新鮮感。仲有令耳朵懷孕，有佢同古巨基合唱重新改編版本既〈愛回家〉： 去歌 ！鍾意🍑🍑啲歌既要支持埋電影原聲專輯啊！ 整體嚟講，係值得支持既誠意之作品！ Cheers, Ada

話說我家主人對手有濕疹，咁多年嚟試過好多嘢佢都唔覺得好幫到手。今次抱住再試下喇嘅心態去用呢一罌balm，有驚喜喎！ Plant Therapy - Silky Soft Healing Balm@ SOFE Aromatherapy : $129 關於用法及成份你哋可以去呢個 網址 度睇下，我想講嘅係用家用後感。佢係好似油咁，所以係非常之滋潤，建議夜晚瞓覺之前搽。用咗幾次之後，會開始發覺濕疹嘅皮膚冇咁乾，冇咁咁容易龜裂。 如果你好似我家主子咁係手部有濕疹嘅話呢，夜晚搽完之後，可以帶一對棉質手套，好好保養。 佢嘅門檻非常低， 113g仲好襟用，有濕疹既入定一罌看門口會有意想不到嘅收穫！ 如果你有一啲有效嘅舒緩濕疹方法，歡迎留言happy share😀 Cheers, Ada P.S. 後記：話說早兩日我小腿有一撻皮膚又乾又痕又拗損咗仲甩皮，冇辦法之際就試下用呢個balm，搽咗兩次第二晚已經好番8成，冇再痕同埋皮膚開始變番平滑，好有驚喜！仲要係KidSafe，小朋友都啱用😊

First Step - Repair Nail Solution by Gental Pink @ amor $248 我係gel甲精，仲要係DIY，年中投資唔少係各式其式用品、產品及配件。今次呢款保養品超級好用，而且門檻低，真心推介！ 成日gel甲嘅朋友都可能會一個問題，就係會爛甲，包括：指甲好軟薄，離甲，及黃甲。最簡單嘅解決方法就係停止gel甲，俾指甲休息，之但係gel開夾嘅就會好唔慣，指甲冇上色，好似光脫脫，冇著衫咁。另一個方法就係用保養品，但係都要冇gel甲嘅情況之下先至可以用到。今次介紹呢支First Step就完全解決到呢個問題！ 首先佢真係有效，如果你能夠停止唔gel甲，只需要三四日時間，每日一至兩次搽上呢款保護品，啲指甲就會有返光澤，離甲好返，同埋指甲強韌番。若然真係唔想停止gel甲，其實呢款保養品係可以喺gel甲之前搽，因為佢唔係油性，係水劑，吸收咗之後就可以繼續gel甲。咁樣做嘅話，係gel甲之前其實已經上咗一層保護膜，keep住保養你嘅指甲。而為咗加強修護，建議每日喺指緣邊及甲底補搽First Step，大概兩星期係gel住甲既情況下都可以養返好啲甲。 暫時只知道係香港amor有呢款產品買。仲有，amor有好多gel甲凝膠及相關產品，絕對係gel甲愛好者嘅天堂！ 希望幫到鍾意gel甲嘅你啦！ Cheers, Ada

無論做什麼工種，都會有指定既working partners，能否工作暢順，就視乎有幾合拍。由第一份工開始，已經係同IT及Creative合作無間，多年搭檔，有一定既默契，當中啲竅門，就係度同大家share吓。 先講IT，一般嚟講，除咗IT team自己人，大部分其他同事都聽唔明IT team講咩。同樣地，IT team都唔完全了解其他人既提問。作為中間人，我通常都會先翻譯老闆既說話，成為IT話，先至同IT team講解requirements。同樣地，我都會先翻譯IT team既方案做人話，先至匯報返畀老闆。唔好睇少呢個翻譯既動作，當中大大減少誤會既發生，係加快進度嘅關鍵！ 至於Creative又要用另一個方法。通常啲老闆會好直接咁comment，例如話：放大啲字，放大啲圖，又或者：不如用第二隻色，仲要加個框。同Creative team溝通之前，要真正理解老闆既用意。其實老闆係覺得啲字同產品圖唔夠突出，又可能係隻色太淡。充分了解問題所在，俾designers用真正合適既方法去處理，達到老闆目的之餘又可以俾同事有空間發揮，令件事得到最佳效果。不過，at the last moment，老闆通常都仲會有選擇困難症，呢個環節，我通常會叫Creative team print哂咁多個version出嚟並建議the best option，咁樣可以盡量減少來回修改次數，加快finalize！ 你哋又有咩秘技？歡迎留言大家交流吓。 Cheers, Ada

對於移民有第一身感受，今次就講吓呢個近期再掀起既熱潮。要離開一個自細長大既地方並唔容易，今次唔講背後動機同原因，不如就講吓現實與心態。 選擇離開都希望係新地方越開新生活，新希望。尤其是有小朋友既，都希望俾更好既環境下一代。回想當年移民，資訊冇現時咁方便，離開咗，就自然全心全意投入新地方，適應當地文化。香港既一切，就只可以從新聞中得知，就同其他國家既新聞一樣，係知識，但已再唔係身同感受。 今時今日，有啲移民者一方面未能完全融入新生活，另一方面又繼續關注香港既一切，兩邊不到岸。其實倒不如專心一意於新環境，做個新人類。我哋會更希望見到佢哋出既post係新事物而不是繼續執著comment香港既時事。 回想多年前選擇回流，感受複雜：一方覺得可以用母語為主既生活好親切，另一方便再次感恩父母當年作出既犧牲，令今時既我有選擇既自由。此終，都係prefer留係出生既地方同大家共同進退。 Cheers, Ada

呢首歌曾經好鍾意，好有感受。今次曾比特呢個版本帶嚟驚喜，雖然梁詠琪版本就有同感啲，但Mike個version就好投入，好有感情。去歌： https://youtu.be/jW6tPa4Tt1c 車廂中雙手將禮物抱緊 新裝衣飾與我夜行 要到午夜裡給你 一刻驚喜的深吻 很想相擁祝福你大一歲 前來你的小小堡壘 卻發覺她也帶著你心愛玩具 我彷彿玻璃鞋盡碎 一點點玻璃鋪於心裡 你花一分鐘想出一句 笑說我會滿意你新居 盡情愚弄我吧 我自行回家 沒有眼淚要留下 不要忘記 我不會是個笑話 盡情愉快吧 但願憑殘忍代價 來年將生命美麗昇華 若忘掉你 感覺很差 讓這灰姑娘被醜化 你得不到一切 別在某天妄想 如過去美麗 我那會是公主 沒有羽扇但我高貴 盡情愚弄我吧 我自行回家 沒有眼淚要留下 不要忘記 我不會是個笑話 盡情愉快吧 但願憑殘忍代價 來年將生命美麗昇華 若仇恨你 感覺很差 無奈這灰姑娘絕不怕 Cheers, Ada

成個星期都落雨，確實影響心情，大腦閉塞兼夾心情欠佳，返工都冇心機打扮，渾渾噩噩咁過咗一個禮拜。 嚟到happy Friday，又竟然有件令我心涼既事發生咗。呢件事係咩唔重要，當中既領悟先係重點： 呢個世界真係咩都有可能，唔好太著重當前，要睇長遠。 職場上冇永遠敵人，不如多個partner仲好！ 機會係留俾準備好既人！ 因為#2，我只係俾自己心涼咗5秒。因為#1&3，我叫自己居安思危。如此一來，今個禮拜都冇白過！ Enjoy your weekend! Cheers, Ada

Trust呢樣嘢好奇特，無論係工作上或者感情生活裡，有佢事事順利，否則注定失敗。 在職場上，都曾經遇過啲大老闆對下屬不信任，凡事都質疑，打爛沙盆問到篤，甚至micromanagement。自問未夠道行，與其硬碰 ，我會選擇忍😅退一步海闊天空！ 至於感情關係中，如果對對方無信任，基本上做咩都會覺得被騙，同朋友出街都會被視為出軌。咁樣既關係又點會開心呢？“疑人勿用”都適用於感情生活。一齊得就要互信，否則趁未變得太難睇之前就要好好處理！ Cheers, Ada

今次要推介既唔係makeup，似skincare多啲。 Pitanium Pi-Recovery Base 表皮匠 - 官網 $780 (40ml) 佢基本上係可當base或裸妝用，並含有skincare成份，所以稱之為 makeup care。佢有3大優點： 由於佢唔係化妝品，所以係唔需要落妝嘅，晚上只需要用普通潔面乳清潔皮膚就可以啦！ 佢含有積雪草修護成份，做完醫美療程之後，搽佢可以修復皮膚。 有追蹤膚色功能，顏色適合亞洲人皮膚。 用法小小特別，如下： 先唧一毫子分量落手背， 用指尖輕輕推開，用手背熱力blend開至半透明，然後搽上面， 如果想遮瑕，可以轉用上妝綿推勻， 佢有SPF40 PA++防曬度，平時返工可無需再搽防曬。 入手價遍高，但由於每次只用少量，一支平均可用到半年。官網一般每個月都有優惠，又或者可以去旺角／尖沙咀實體店試吓上手先決定入貨😄 Cheers, Ada

話說公司open office既設計係用半partition既，即係只遮到一小半，從檯面至大概一部notebook打開咗咁高，坐係度都可以清楚見到大家個頭至半身。隔離位做緊嘢定開緊FB都清楚一目了然。 咁team head就總覺得再open啲大家會work得close啲，open office就係要全開放既。於是，就問我哋對partition既意見。以下係我哋一致既回覆： “ 依家個partition已經毫無私隱可言，只係僅僅可以令我哋嘅工作檯保持整齊，亦都冇阻住我哋溝通傾嘢。” <此回覆終結了此話題> Cheers, Ada

今日講吓眼影，口罩下絕對係可以重點提升整個outlook既。 近幾年都興啲棕色系nude啲既顏色。今次推介既KATE眼影盒係必入手既超高CP值好物！而當中佢既「棕影×彩色陰影」眼影盒更係百搭超好襯。 佢色系夠潮，但極其自然，亦能深邃立體，而且仲有3個優點：顯色、不脱妝、易落妝。佢官網仲提供 詳細既眼影畫法教學 。 佢粉質細膩，好暈染，而且抵買，最啱買定多幾款看門口，可以單用、疊擦或搭配其他眼影盤。 各大藥妝店KATE專櫃有售 - $97/palette Cheers, Ada

有幾耐冇派卡片？好似都係近呢幾年受疫情影響，工作partner見面可免則免，通常Teams/Zoom都e-meet咗，再見面時早已經熟絡，已冇需要派片。 實體卡片好似已經係上世紀既文物，之前收咗既卡片，過多一段時間應該會成古董。以前派卡片通常都係為咗3個原因：話俾對方知自己係 1) 邊間機構，2) 咩職位，3) 聯繫方法。而到咗今時今日，又email、又whatsapp，係見對方之前已經摸清底細，見面時交換卡片就似集郵，再冇實際用途。如果講實用，working level直接whatsapp對方已經可以，高層既就email，已經達到目的。 有機構推出e-business card，有創意之餘又環保，同時又可以保留派卡片呢個傳統。嘟一嘟QR code就有齊對方資料，仲方便埋加入手機contact。而且，e-business card更新更方便，升職調職都唔駛再印過晒啲卡片，便捷又經濟。依家可以 製作自己既e-Business card 喇！ 宜家乜嘢都講求digitalize，為metaverse作出準備，你仲諗到啲咩可以數碼化呢？ Cheers,

身邊總會有一兩個朋友入咗局做傳銷，又或者自己都中招做過。做咗marketing咁多年，都曾經研究過呢類型既marketing，不如我哋就立體啲分析吓network marketing呢個行業。 遠係online marketing出現之前，我哋除咗通過傳統宣傳渠道收到新產品資料，另外都會十分依賴從相熟親友介紹試過既產品。所以，network marketing就係半世紀前興起。當時啲人一窩蜂入會，而基於當年人與人之間既關係都係靠見面，信賴度比較高，人傳人既方法係有效既。亦由於network marketing多數採用MLM，所以唔排除早年入行既到今時今日已經上岸，行行出狀元。而事實上也有唔少用傳銷而成功既公司，如Amway、Mary Kay、Avon、Nuskin等。 時之今日，有eCom、social media、digital marketing等令資訊氾濫既年代，network marketing仲有冇得做呢？其實就有利有不利。對於傳銷公司而言，而家一個eshop＋social account已經可以做到宣傳兼收單，依靠下線去銷售嘅需求係大大減少咗嘅。而且，多數人已經對傳銷存戒心，可能因為之前有太多負面個案，所以下線依家都好難做。之但係都總有人會仲入會嘅，咁佢哋都可以好好運用而家嘅數碼渠道去建立自己嘅network，條路比幾十年前難行，勤力啲都有機會突圍而出既，玩票式當part-time賺外快還可以。 之但係，依家資料發達，要做啲生意仔都唔難起步，如果有心提供一啲產品或服務去幫人都有好多可能性，不防多方了解吓，無需急於俾大機構制肘。此外，為咗做network marketing而於本來純友誼互相信任既關係中變得有目的亦唔值得。最後，傳銷只是marketing手段既一種，一路買佢既products，一路人肉幫佢宣傳，收返嚟既回報其實仲低過最低工資，計落條數真係有啲蝕，雙輸！ Cheers, Ada

要展現blink blink嘅眼睛，除咗化妝，就一定要打好個底，事關眼周肌膚特別脆弱，要好好保養佢。多年來一直都試啲唔同品牌嘅眼霜、精華俾對眼，但係都冇一啲係好有效嘅，直至近期遇到以下呢款。 Dermacept Vitnamin C5 Serum ( 官網 - $315) 單睇價錢，同埋佢只係喺萬寧、Logon嘅open counter出售係估唔到佢功效咁好嘅。先睇吓official成份同功效：打正旗號"by Zein Obagi, M.D."醫美權威主理，已經係信心既保證。佢有5% 純維他命C精華，全效針對黑眼圈、眼紋、鬆弛眼肌等複合性眼圈問題。仲可以促進血液循環，改善眼部皮膚黑色素沉澱、黑眼圈問題；再加上升級抗氧化效能促進膠原蛋白合成，提升眼周肌膚彈性及預防鬆弛。 好啦，咁又分享下我用後感。佢係serum，所以搽完爽膚水之後就可以滴4滴左右搽喺眼底。 佢唔笠，吸收得好快，夏天用都ok。我用咗大概兩個星期到，就開始見到眼周嘅肌膚係緊緻咗，同埋黑眼圈係淡咗嘅。我而家已經回購咗兩支 ，察覺到眼周嘅皮膚係強韌咗，冇咁薄弱。不過佢始終唔係眼霜，所以我建議係用佢之後，都係搽番一啲有保濕作用嘅眼霜，加強滋潤。 入手價唔太貴，有興趣嘅靚靚，不妨試下！ 歡迎留言開心share你哋嘅心水護眼肌品！ Cheers, Ada

NFT，相信近期大家都見唔少，我就唔係度講background。不如就講吓因咩原因我對佢感興趣。 CRM一直都係eCom既重要一環。做咗eCom咁多年，近年開始鑽研CRM，一路都冇咩突破新發現，直到近期NFT流行起來。一連串數碼藝術品之後，除之而來有行家開始將NFT同CRM串連起來。透過NFT建立獨一無二既數位資產，我哋可以創建任何可以代幣化的東西，包括獨家優惠、特權、甚至會籍。 試想想，我哋可以為VIP及忠誠客戶提供NFT作為會員身份。 佢哋可於將來舉行的活動中行使NFT賦予既權利。例：如果Mirror既演唱會門票係NFT咗，metadata就可以發揮多種用途，包括以下重點功能： 證明真偽 證明出席 證明擁有 有咗呢3樣証明，我哋就可以提供一系列限定產品、體驗去聯繫目標客戶群。以Mirror演唱會為例，我哋往後可以俾出席過演唱會既fans優先新產品推介及試用、試聽新歌、dl新相或購買應援品，甚至頭等位忠粉可以定期同偶像見面！ 呢種專貴身份既experience，可以透過NFT一一呈現，正就係CRM既精髓。 而現實中已經有機構開始應用NFT升級CRM體驗：Starbucks剛係5月初宣佈會建立數碼社區 - “third place”，一個介於工作及家庭之間屬於咖啡既地帶。詳情請瀏覽此 article 。 本地既使用情況又如何？請瀏覽此 香港NFT市場情況調查報告 。 NFT X CRM仲係一個新concept，有部份機構正構思如何運用或已test & learn中。佢會唔會成為主流係未知既，但由social media開始，數碼社區已成雛形，亦將會繼續發展，所以我哋都可以密切關注如何可使用此新趨勢捉緊潛藏商機！ 歡迎於留言俾意見或提問。 Cheers, Ada

近年越來越覺得上網買嘢選擇比實體店多，就算是本地商店都有咁既趨勢。試過想買小家電或者beauty device，上網research後，諗住去各大實體電器店可以睇吓件產品，實在啲先決定即時買現貨，點知反而實體店冇咁多選擇，結果都係網購。 上網買野有另外一個好處，就係Google大神會畀海量嘅資料你。之但係，可能好多靚靚對於上網買衫買鞋買飾物會有啲猶疑，因為未＂埋鏡拼過＂ 試過都係好唔實在，經常都會中伏。所以，今次集合咗平時上網嘢扮靚嘅網站，一次過推介俾大家。 111 korean fashion 佢啲衫全部都來自韓國，每個星期都會有幾次FB live有特價，平均嚟講價錢都算經濟，款式就偏向穩陣。實體店喺太子聯合廣場， 但一般嚟講平時睇live買都好方便，落單後可選擇寄到付或去門市取貨。現場仲有本地手作耳環March cat寄賣，想睇齊款亦可去佢 網店 選購。 StarLazy 佢啲衫都係來自韓國，實體店都係喺太子聯合廣場。一般都係喺FB睇新貨Inbox落單，size資料充足，落單後訂貨大約7至14日到貨。款式就比較多同埋潮，質料都靚嘅，價錢就會貴少少。 Pindot Fashion 佢啲衫都係來自韓國，冇實體店，除咗FB Inbox仲可去 網店 自己落單。有部分貨係現貨，其他都係要訂，7至14日到貨。款式唔太多，但特別同靚料，價位少少貴。 Macaron Korea Fashion 全部衫來自韓國，冇實體店，有個網店但係唔經常update，一般都係新衫睇FB，然後用FB Inbox落單。佢有個特色，就係勁多OPS同set。價錢經濟。 Leather Lab 香港設計師品牌手工皮鞋。實體店係尖沙咀K11，亦可去官網 Lison 自行選購。價格反映佢哋既鞋係手工製而且係真皮、仲要係當季最受歡迎既款式。之但係咁，一對襟襯嘅鞋絕對會令整個造型加分，值得放血揼本。 Index.25 呢間耳環戒指飾物IG Shop兩個字形容：潮、抵！大量入手用嚟襯衫都一啲唔心痛！ 今次介紹住咁多先，歡迎大家留言推介你哋既心水店，開心share！ Cheers, Ada

近日追完一套韓劇：《二十五，二十一》，表面上係一套青春愛情劇，但其實當中仲有其他支線帶出唔同信息。 呢套劇setting在1998年，描述追求遠大抱負的18歲劍擊選手既奮鬥過程，過程中遇到正努力開啟新人生的22歲年輕＂小鮮肉＂😍。他倆經歷3年相處，在25歲和21歲才相愛。 套劇有3大重點：1) 年紀輕輕就成為國家代表運動員，要在面對各種壓力下長大，2) 落難富二代因金融風暴突然失去經濟支柱，需要自己開拓人生，從面對失敗中成長嘅經歷，3)  一段用時間去清楚了解對方，共同徬徨、彼此依靠中開始既感情，最終，都敵不過時代洗禮而分開。 Photo from the Internet 呢套劇，將青春時期的愛情、友情、親情以及成長時期的心路歷程，都寫得非常細緻，各種情感方面的描寫也是相當動人，真係一睇就入迷！ 有興趣就上Netflix煲喇！ Cheers, Ada

一直認為，工作係生活一大部分，所以咁多年嚟都著重份工係要做自己enjoy既嘢，揾$之餘都要有滿足感。 今次重生，係工作上要感恩遇到幾位伯樂，多得佢哋發掘，才没有被埋沒於不適合既工作中。其實回顧職場打滾咁多年，大部份工都有貴人上師栽培，獲益良多。 當然唔係每次都咁好彩，都曾經遇上困局，受到困擾，但係好慶幸都遇上幾位專業人士，畀意見我，幫我渡過難關。之後檢討返，當中都有寶貴得著，成為更深刻既成長印記。 仲有，一路走來，好感激命運按排咗我家主人係我身邊，一眨眼今年已經第20年了。適逢今日參加朋友婚禮，係莊嚴既教堂內，一面祝福一對新人，心裡play back同我家主人既經歷，唔容易但暖在心。當中領悟到包容對方缺點，同埋從日常生活小事去保溫。 "愛是恆常忍耐的、慈祥的。愛不嫉妒，不誇張，不自大，不作無禮的事，不自私自利，不輕易動怒，不計較别人的過錯，不喜歡不義，只喜愛真理：愛，凡事包容，凡事相信，凡事盼望，凡事忍耐。愛是永存不朽的。" - 聖保祿宗徒致格林多人前書 13:4-8 如果我有80年生活係地球，而家先啱啱行到生命嘅中間點，仲有一半時間畀我去期待、發掘。宜家，正係下半場嘅開始，請多多指教！ Cheers, Ada

疫情兩年其間，都好耐冇化全裝，反而眼妝就越來越重視。嚟緊幾次產品介紹都會著重對眼！今次首先講眼睫毛。 左: YSL Mascara Volume Effet Faux Cils Lash Primer ( Strawberrynet - $263) 右: benefit Roller Lash (Sephora - $240) 本身眼睫毛都算長、密、黑，但就唔識得自己翹，同埋本身毛髮都粗，又容易出油，就算用電睫毛夾，都好難整到佢keep住攣，而且中午就變熊貓眼。多年來都一直物色方便快捷有效嘅mascara，上圖係無敵組合，我通常咁用： 先用睫毛夾夾攣 再用電睫毛梳梳理 搽一層YSL lash primer - 佢會增長睫毛，同埋令佢根根分明唔結塊 再上benefit mascara - 佢會令睫毛向上捲翹，同埋有效防油，用足成日都唔會溶妝 用咗呢個組合，眼睛明顯放大5至10%， 戴住口罩對眼都迷人炯炯有神。除咗以上兩個地方買到，建議可以Google大神下其他網上優惠。 Cheers, Ada P.S. 懶夾眼睫毛搽mascara嘅靚靚可以考慮做角蛋白，我 之前都有介紹過 。

基於疫情而生出嚟既一個項目：staycation 一開始時覺得呢個活動好無聊。明明有屋企舒舒服服唔返要住酒店。疫情期間更要注意衛生，遍遍要瞓人哋瞓過既牀，為嘅就係一路住酒店，一路幻想自己係去緊旅行，但係明明旅行嘅精粹就係觀光遊歷同休息。 View from Peninsula indoor pool 當市場上陸續推出各式各樣既優惠package，我都受唔住引誘試咗一兩次。＂出發＂前仲隆重其事同我家主人一齊plan＂行程＂。 綜合而言，我就有以下啟發： 一啲高級酒店，平時我哋通常都唔會去住，就算去旅行都未必會揀。但藉著呢啲優惠，我哋都可以享受一下。 住港咁耐，好多本地嘅地方我哋都未必作深度遊。Staycation令到我哋可以喺酒店附近嘅地方，細心遊玩，發掘local新事物。 平時週末喺屋企好多時都會為啲瑣事騰嚟騰去，未必真係休息到。離開屋企一晚半晚，專心遊玩同埋食食食，達到快速叉電既效果。 可以嘅話當然係搭飛機去旅行先盡興啦！但係抗疫疲勞下，weekend出走兩日一夜，去平時少去既地方行下，或者好好咁同家人朋友享受美食靚景，舒緩鬱結，更可平衡weekday既刻板。有主子嘅朋友，仲可以帶埋寵物嚟個petcation， 好好relax。 Cheers, Ada

不經覺又放低咗呢個blog整整3年…要回顧檢討嘅實在太多，俾少少時間我係度一一分享。 2019-2020年中係輕鬆既，一切都好順利，順暢到有啲夢幻。工作上有莫大既滿足感，當然付出既努力同時間係成正比，所以只有忙忙忙，可以話冇太多思考沉澱嘅機會。 2020年下半，命運開始俾考驗我，亦都畀機會我。心口得個勇字既我，選擇跳出comfort zone，接受挑戰… 之後，2021年全年係我既黑暗時代：嘗試、碰釘、失敗、再接招、亂了陣腳、改變、忍耐、再嘗試。正當要放棄時，命運開咗一道新門俾我！ 2022年，受Omicron影響，開始得不容易，但堅持之後，一切漸入佳境，家庭、工作、social life再次開始平衡到，有啲重生既感覺。 希望今次pick up返呢個blog，可以係俾個機會自己review吓過去幾年既種種，檢討之如改善將來。 待續… Cheers, Ada